BAGUIO CITY – Mapalubusan dagiti turista manipod Region 1 wenno Ilocos Region a sumrek iti maibilbilang nga undisputed Summer Capital ditoy pagilian mangrugi inton October 1.
Maipalagip a manipud iti September 22 nga inisyal a naituding nga reopening date ti Baguio para iti Ridge to Reef’ travel bubble program ket naitantan manen.
Sigun kenni City Mayor Benjamin Magalong, daytoy ket gaputa adda pay dagiti isyu kadagiti maseknan a lokal a gobyerno a nasken a maisimpa kas iti pagkasapulan para iti panakapapintas ti online registration platform ti siudad para kadagiti turista manipud Ilocos Region.
Innayonna a nasken metlaeng a maobserbaran ti panagwaras ti COVID-19 iti dua a barangay ditoy siudad.
Nupay kasta, agtultuloy latta ti panagparehistro dagiti interesado a turista a sumrek ditoy siudad babaen iti Baguio Visitors Information and Travel Assistance (VISITA).
Maimplementar met ti 200 visitors carrying capacity iti innaldaw tapnu maliklikan ti overtourism wenno adu unay a turista.
Naamuan a puntirya met dagiti probinsia iti Region 1 nga ilukat ti turismoda inton October 1 ken iti katengngaan ti October.
Kabayatanna, kinumpirmar ni Mayor Magalong a mairaman ti Benguet iti tourism bubble ti Baguio City ken Region 1.
Resulta daytoy ti panakitaripnong ni Tourism Secretary Bernadette Romulo-Puyat kadagiti mayor ti La Trinidad, Itogon, Sablan, Atok ken Tublay ken kadagiti gobernador ti Benguet ken Ifugao seknan iti panaglukat manen ti domestic tourism.
Kabayatanna, linawlawagan met ni Mayor Magalong nga iti sidong ti tourism bubble ket maipawil ti ‘do it yourself’ travels isut gapuna a dagiti laeng guided tours ti maipalubos.
Mapawilan to a sumrek wenno agsubli ditoy siudad ken mapapanaw dagiti maduktalan nga aglabsing kadagiti amin a pagalagadan iti panakailukat ti turismo ti Baguio.
