BAGUIO CITY – Kidkiddawen ni Baguio City Mayor Benjamin Magalong ti panakaimbestigar ti rehabilitasyon ti Baguio Convention Center.
Kagiddan iti daytoy, impeksana manen ti panakadismayana iti inawaganna a substandard work iti pasilidad.
Sigun kenkuana, kiddawenna ti tulong ni DPWH Secretary Mark Villar iti panakasukimat no pudno a P150-M ti gatad ti patrabaho.
Dinakamatna nga indanunnan ti pakaseknanna kenni Secretary Villar ken mangnamnama daytoy a saan a baybay-an ti dadaulo ti DPWH ti estado ti convention center.
Impettengna a napaay ti patrabaho iti pasilidad a mangragpat iti expectations ken ti projected make over manipud iti naudi nga insayangkatda nga inspeksiyon.
Innayon ti mayor a saan a naragpat ti world class convention center ken awan ti mapaspastrekan ditoy ti lokal a gobyerno gaputa agtaltalinaed ti pasilidad a non-functioning asset.
Inyunay-unayna a saan nga aprobaran ti lokal a gobyerno ti Baguio ti rehabilitasyon ti convention center.
Maipalagip a naituding a maipaiman iti lokal a gobyerno ti convention center ngem saan pay a nalpas ti patrabaho iti uneg daytoy.
Nagresulta pay iti panakariro ti panangrebisar ti DPWH-Cordillera iti immunan a plano para iti panakaisimpa ti Baguio Convention Center.
