BAGUIO CITY – Maipawpawil ti panaka-aramat dagiti plastik a campaign materials kadagiti lugar nga addaan ordinansa a mangipawpawil iti panagaramat ti plastik.
Iti panakiyuman ti Bombo Radyo, inlawlawag ni Benguet Provincial Election Supervisor Atty. Nicasio Jacob a nailanad iti resolusyon ti COMELEC en banc a no adda ti ordinansa ti maysa a lokal a gobyerno a mangipawpawil iti plastik ket kaipapananna met laeng nga epektibo daytoy kadagiti campaign materials.
Sigun kenkuana, nabayag a diskusyon ti nasao nga isyu nupay iti Baguio City ken La Trinidad, Benguet ket addaan ti ordinansa a mangipawpawil iti panagaramat ti plastik.
Inlawlawagna a maiyaplikar ti nasao nga ordinansa kadagiti campaign posters gaputa saan met a mabalin a direkta a mailanad iti ordinansa a maipawil ti plastik a campaign poster.
Nupay kasta, innayon ni Atty. Jacob nga uray saan a plastik ti campaign material no adda ti panaglabsing daytoy kadagiti maitudtuding a pagalagadan ket ikkatenda, kas metlaeng kadagiti plastik a campaign materials.
