![](https://img.bomboradyo.com/baguio/2020/12/COVID-19-vaccine.jpg)
BAGUIO CITY – Agsagsaganan ti lokal a gobyerno ti Baguio para iti panakaisayangkat ti mass vaccination kontra iti COVID-19 ditoy siudad inton sumaruno a tawen.
Sigun kenni Mayor Benjamin Magalong, maysa ti Baguio kadagiti napili a pilot areas a panakisayangkatan ti libre a mass vaccination kontra iti COVID-19 babaen iti nasyonal a gobyerno.
Kinunana a mangnamnamada a maisayangkat ti nasao a panagbakuna iti umuna nga innem a bulan ti sumaruno a tawen.
Innayonna a no addan ti bakuna kontra iti COVID-19 ket mabaelanen ti siudad a mabakunaan ti 20-30 percent kadagiti umili ti Baguio.
Imbinglayna met nga iti plano ti lokal a gobyerno ket maiyun-una a mabakunaan dagiti health workers a sarunuen dagiti narisgo a sektor, partikular dagiti nakukurapay a senior citizens ken maikatlo dagiti dadduma pay a frontliners.
Maipalagip nga addan ti ginatang ti lokal a gobyerno a vaccine storage wenno freezers sadiay China a pakaidulinan dagiti maited ditoy siudad a bakuna kontra iti COVID-19 ken manamnama a sumangpet dagiti nasao a kagawaan ditoy pagilian inton sumaruno a bulan.