BAGUIO CITY – Ikagkagumaan ti provincial government ti Abra a mangidanun iti tulong kas iti food ken non-food packs kadagiti babbarangay a naka-isolate ita sadiay gapu iti mapaspasaran nga epekto ti nepnep.
Immunan a kinuna ni Arnel Valdez, PDRRM Officer ti Abra iti interview ti Bombo Radyo Baguio a na-isolate ti siyam a barangay iti innem a munisipyo sadiay Abra kalpasan a ngimmato ti lebel ti danum iti Abra River.
Kinunana nga idi malem kalman ket nadanunda ti Barangay Collago, Lagayan ken nagaramatda iti salbabida tapnu maidanun dagiti food packs iti igid ti karayan.
Inaklonna a karit paylaeng kadakuada ti panangitulod ti tulong kadagiti dadduma pay nga isolated a babbarangay gapu iti kangato ti lebel ti danum iti Abra River.
Dinakamatna a dua agingga tallo paylaeng nga aldaw ti nasken a palabsen sakbay a bumaba ti danum ti Abra River, no sadino, apektado dagiti munisipyo ti Lagayan, Danglas, San Quintin, Langiden ken Manabo.
Maibasar pay iti panagwanawan ti PDRRM Office ti Abra, dumanonen iti 40 ti insidente ti panagreggaay ti daga sadiay nupay agtultuloy ti panagwaknit dagiti pulis, barangay officials ken dadduma a miembro dagiti Municipal DRRM Councils.
Innayonna nga iti pakabuklan ket 3,206 a pamilya ita ti apektado manipud iti 13 a munisipyo sadiay Abra bayat a dumanon iti tallo a balay ti natupakan idi kalman iti natumba a kayo ti mangga.
Kabayatanna, naisangpet metten iti baro a provincial warehouse sadiay Bangued, Abra ti agarup 6,000 a family food packs ken dadduma pay a non-food items manipud iti regional warehouse ti DSWD-Cordillera.
Paset daytoy ti panangipasigurado ti ahensia nga adda ti umdas a suplay ti relief items iti tunggal probinsia ti Cordillera para kadagiti pamilya a maapektaran iti agdama a nepnep.
Kabayatanna, agpatpatulong met dagiti umili sadiay Barangay Palang, San Quintin kalpasan a nairaman dagitoy kadagiti na-isolate sadiay gapu iti panagngato ti lebel ti danum iti Abra River.
Sigun kadagiti umili, kasapulanda nga apan gumatang kadagiti essentials nangruna ti bagas ken agas dagiti senior citizens.
