BAGUIO CITY – Naibilin kadagiti amin a lokal a gobierno iti probinsia ti Kalinga ti mangdesignar iti bukod dagitoy a burial sites para kadagiti residenteda a pumusay gapu iti COVID19.
Iti eksklusibo a panakiyuman ti Bombo Radyo Baguio kenni Jenica Mercado, Public Information Officer ti probinsia, inlawlawagna a tunggal munisipyo sadiay ket binilin ti Department of Interior and Local Government (DILG) a mangdesignar iti bukodda a burial sites.
Kinunana a nasken a maiyadayo dagitoy iti 30 a metro manipud kadagiti pagtaengan ken kasapulan a naun-uneg ti panakakalida no ikumpara iti innem a kadapan a kadawyan a kauneg dagiti burial sites.
Inlawlawagna a kadagiti lugar nga adaan iti sementeryo ket maiabay ditoy dagiti maidesiganar a burial sites.
Dinakamat pay ni Mercado nga agpada ti pagalagadan a suruten dagiti maidesignar burial sites kadagiti pribado a burial sites iti nagduduma a paset ti probinsia.
Innayona a nasken maitabon iti uneg ti 24 nga oras dagiti pumusay a nakaptan iti COVID19 malaksid kadagiti bankay a maipasidong iti cremation.
Iti agdama, addan ti nakali a sangapulo a burial sites sadiay Balong ken Agbanawag, Tabuk City, Kalinga.
Maipalagip a naipasidong iti Modified Enhanced Community Quarantine ti intero a probinsia mangrugi ita nga aldaw agingga inton Oktubre 15, ti agdama a tawen.
