BAGUIO CITY – Ad-adalen ita ti Provincial Inter-Agency Task Force (IATF) ti Benguet ti posibilidad a panakaikalikagum ti panakaipasidong iti swab test dagiti amin a matmatay iti masakupan ti probinsia.
Sigun kenni Governor Melchor Diclas, babaen iti daytoy ket maipanamnama ti seguridad ti salun-at dagiti umili a mangisayangkat ti panaglamay, nangruna dagiti pamilya wenno kabagian ti pimmusay.
Kinunana nga insingasing a mismo dagiti sumagmamano a mayor iti probinsia ti nasao a kalikagum kasaruno ti agtultuloy a panakailista ti kaso ti COVID-19 sadiay.
Innayonna a maysa kadagiti makitkita a rason iti panagwaras ti COVID-19 iti Benguet ket dagiti maisaysayangkat a panaglamay kadagiti minatay a saan a sigurado no nagpositibo iti coronavirus wenno saan.
Nupay kasta, kinunana nga adalenda a naimbag ti nasao a singasing ken urayenda ti desisyon ti Department of Health iti daytoy.
Nakedngan met iti taripnong ti Provincial IATF a dagiti Municipal Health Officer ti mangdetermina no ti maysa nga indibidual a pimmusay iti masakupanda ket nasken a maipasidong iti swab test wenno saan.
Maipalagip a nasken a dagus a maitabon wenno mai-cremate dagiti indibidual a pimmusay gapu iti COVID-19.
