Inlawlawag ni Arlyn Bambico, maysa a principal sadiay La Union a saan a nalaka ti panakaikkat ti lisensya ti maestra a nagviral itay nabiit agsipud ta kasapulan a dumalan daytoy ti umno a proseso ken imbestigasyon.
Iti panakiuman ti Bombo Radyo kenni Bambico, kinuna a ti panakaipaay ti show cause order iti maestra ket saan a mangipasimudaag a guilty daytoy no di ket naipaayan daytoy ti gundaway tapno ilawlawagna ti nasao nga insidente.
Ken no adda a mapaneknekan daytoy a guilty, mapatta-patta a mabalin daytoy a madismiss iti trabaho wenno masuspindir manen.
Nu pay kasta, nagpalagip ni Bambico nga iti panagbalin a maestra ket kanayun a maipalpalagip ti child protection policy no sadino mataltalantan dagiti saan a rumbeng nga aramiden kadagiti uubbing wenno estudyante.
Dumaldalan met dagiti maestra iti orientation ken teacher induction tapno adda a liklikanda ti anyaman a saan a nasayaat nga interaksyon kadagiti estudyanteda.
Kanayunanna, kinuna ni Bambino nga iti panagbalin a maestra ket talaga a kasapulan ti kinaanus nangruna ket ado dagiti klasen ti uubbing.//Mira
