BAGUIO CITY- Mairekreklamo ita ti pannakailako ti tilapia manipod Viscaya ken Lamut Ifugao sadiay Bokod, Benguet.
Sigun iti Bantey Pisek Kiweng Organization Incorporated ti Barangay Ambuklao iti munisipyo, agtultuloy ti pannakailako ti tilapia nga agtataud sadiay Viscaya ken Lamut, Ifugao iti Barangayda iti baet nga addaan dagitoy iti umdas a suplay.
Gapu iti dayta, adu kadagiti tarakenda a tilapia iti saanda a kalkalapen gaputa awanen iti pangilakoanda a mangituntunda iti dakkel a pukar iti biruk dagitoy
Mainaig iti dayta, kinunana ni Bantey Pisek Kiweng Organization Incorporated President Federico Jose a nu saan a malapdan ket matatakan wenno maikkan iti label dagiti tilapia nga agtataud sadiay Viscaya ken Lamut Ifugao tapnu maamoan dagiti gumatang iti nagtaudan dagitoy.
Dinakamatna nga adun a reklamo ti naawatda gapu iti simmabali a raman dagiti tilapia a magatgatangda sadiay gapu iti nasao a rason.
Kinunana a naiyuman na daytoy iti lokal a gobierno ti Bokod babaen iti Municipal Agriculture Officer ngem agingga iti agdama ket agtultuloy paylaeng t parikotda a nangrugi idi napalabas a tawen.
Iti baet ti dayta, mangnamnamada a maikkan iti aksyon ken solusyon ti parikotda kagiddan iti selebrasyon ti Tilapia Festival ti munisipyo ita a tawen Iti agdama, dumanon iti 1 ton agingga 1.5 tons a tilapia ti apapiten wenno kalkalapenda iti inaldaw.
