BAGUIO CITY – Kidkiddawen ti lokal a konseho ti Baguio ti panangilibre dagiti agtagikua kadagiti balay pagabangan ken dormitoryo ditoy siudad iti bayad wenno abang dagiti estudyante nga agab-abang kadakuada a saan a nangukupar iti ab-abanganda kabayatan ti enhanced community quarantine (ECQ) ken and general community quarantine (GCQ).
Iti interview ti Bombo Radyo Baguio, kinuna ni Councilor Vladimir Cayabas, chairman ti Committee on Education a saan a mandato daytoy ngem ketdi, apela para iti panangipakita dagiti boarding house ken dormitory owners iti asi kadagiti nasao nga estudyante.
Dinakamatna a saan met a naaramat dagiti estudyante dagiti nasao a silid wenno espasyo gaputa napilitan dagitoy a nagawid kadagiti probinsiada kabayatan ti ECQ ken GCQ.
Kinunana nga agdepdependar metlaeng dagiti estudyante kadagiti nagannakda gaputa saan met nga agtatrabaho dagitoy ngem uray dagiti nagannak dagitoy ket apektado met iti epekto ti agdama a COVID-19 pandemic.
Nupay kasta, bigbigbigen met ti resolusyon para iti nasao a kiddaw a saan nga amin nga agpapa-abang ket big time businessmen ken sumagmamano kadagitoy ti agdepdependar kadagiti ipapaabangda a silid.
Naamuan nga 85 percent kadagiti estudyante iti kolehio ditoy siudad ket nagtaud iti ruar ti Baguio ken agab-abangda laeng kadagiti boarding houses, dormitories, bed spaces wenno apartments.
