BAGUIO CITY–Pormalen nga impaima ti Department of Public Works and Highway (DPWH)-Cordillera ti dua a COVID-19 Isolation Facility nga aggatad iti P8.1-M iti lokal a gobyerno ti Tublay, Benguet iti naisayangkat a turn-over ken inauguration ceremony idi kalman.
Indauloan dagiti sumagmamano nga opisyales ti Benguet ti nasao nga aktibidad pakairaman ni Congressman Eric Go Yap, Governor Melchor Diclas, Mayor Armando Lauro, representative manipud iti DPWH-Cordillera ken representative manipud iti DOH-Cordillera.
Impeksa met ni Tublay Mayor Armando Lauro ti panagyamanna iti kongresista gapu iti initiatibo daytoy tapno mapundoan ti nasao a proyekto.
Kagiddan iti dayta, inyunay-unay met ni Congressman Yap nga aramaten dagiti indibidual a makaptan iti COVID-19 ti naibangon a pasilidad.
Kabayatanna, dinakamat ni Governor Diclas a karaman dagiti opisyales ti Benguet nga agpabakuna kontra iti COVID-19 tapno maikkat ti buteng dagiti umili nga agpabakuna iti kanito a maisayangkat ti vaccination roll-out.
