“Dagdag pahirap,” kasta ti panangiladawan iti maysa a jeepney driver iti Baguio City ti panagngato iti presyo iti produkto a petrolyo ita a lawas.
Dayta ket gapu ta kagiddan ti oil price hike, maksayan met ti mapastrekan dagiti driver nangruna ket ad-adda manen a ngumato ti makonsumo dagitoy tunggal biahe gapu iti kasasaad iti trapiko.
Gapu iti dayta,makidkiddaw met a mapatgan ti panakaingato iti pasahe iti kabiitan a panawen.
Iti panakiuman iti Bombo Radyo ti maysa a driver iti terminal iti jeep idiay Kayang Street, kinunana a nupay saan nga umdas ti piso a kanayonan a pasahe ket akseptarenda latta daytoy tapno laeng manayonan ti pamastrekanda ita a ngimmato ti presyo dagiti produkto a petrolyo.
Sigun iti driver, saan nga umdas para iti pamilyado a kas kenkuana ti mapaspastrekan manipod iti trese piso a pasahe dagiti komyuter.
Innayonna nga uray pay nu agbalin daytoy a katorse piso, saan latta nga umdas kaspangarigan dumanon ito PhP70 tunggal litro ti presyo iti krudo.
Gapu iti dayta, daduma kadagitoy ti umap-apela iti gobyerno nga ingato ti pasahe iti tres agingga lima a piso.
Maipalagip a nangrugi nga agepektibo idi kalman ti staggered oil price hike nu sadino, ngimmato ti presyo iti diesel iti P2.60 tunggal litro, gasolina iti P1.75 tunggal litro ken kerosena a ngimmato iti P2.40.
Kabayatanna, manamnama met nga agepektibo inton bigat wenno inton June 27 ti sabali a round iti staggered oil price hike.//Bombo Rob Dominguez
