BAGUIO CITY – Nangrugin idi kalman ti panakaipaay ti cash grants dagiti benipisaryo ti Pantawid Pamilyang Pilipino Program (4Ps).
Iti interview ti Bombo Radyo Baguio kenni Fatima Florendo, Regional Program Coordinator ti 4Ps-Cordillera, kinunana a gaputa panawen ti krisis ita ket saan a mabalin a saan a maited ti cash grants dagiti benipisaryo tapnu adda met ti gastuen dagitoy.
Kinunana a naipaayen ti cash grant babaen iti cash card wenno ATM cards dagiti benipisaryo iti rehiyon Cordillera.
Nupay kasta, inyapelada met kadagiti awanan ti cash card iti panag-uray dagitoy iti paka-ammo manipud iti DSWD no kaano a maala dagitoy ti cash grant-da manipud kadagiti nagduduma a pay-out centers.
Dinakamat ni Florendo a mapattapatta nga agarup laengen iti 500 ti bilang dagiti benipisaryo ti 4Ps nga awanan ti cash card.
Maibasar iti kaudian a datus dagitoy idi March 15, dumanonen iti 60,139 dagiti benipisaryo ti 4Ps iti rehiyon Cordillera.
Kabayatanna, inyapela ni Florendo kadagiti babbarangay ti saan dagitoy a panangilaksid kadagiti 4Ps kadagiti kangrunaan ken umun a nasken a maipaayan ti family food packs gapu iti mapaspasaran a krisis nga intunda ti manarimaan nga Enhanced Community Quarantine iti Luzon gapu iti COVID-19 pandemic.
Sigun kenkuana, nabagaan dagiti amin a lokal a gobyerno a no mabalin ket amin a benipisaryo ti 4Ps ket mainayo iti listaan dagiti nasken a makaawat iti nasao a tulong.
Innayonna a saan a maiparbeng ti naamuanda nga adda dagiti mangibagbaga a saan a rumbeng a maipaayan iti food packs dagiti benipisaryo ti 4Ps gaputa adda metten ti cash grant dagitoy.
