BAGUIO CITY – Inlawlawag ni PLtCol. Zacarias Dausen, dadaulo ti Traffic Enforcement Unit nga ar-aramidenda laeng ti trabaho dagitoy tapno agbalin a naannayas ti gunay ti trapiko ken maaramat ti amin a kalsada iti siudad ti Baguio.
Kasaruno daytoy ti saan a nasayaat a komento a maaw-awat iti nasao nga opisina seknan iti panangipaayda iti citation ticket kadagiti aglablabsing a motorista.
Sigun kenkuana, nainget ti panagbantayda kadagiti nagduduma a kalsada iti siudad partikular iti road obstruction, illegal parking, ken daduma pay.
Impettengna a kasapulan a dagus a ‘masita’ dagitoy tapno saan a tuladen dagiti daduma pay a motorista, a posible a mangitunda iti nailet a gunay ti trapiko iti siudad.
Innayona pay a nainget ti panangisayangkatda iti anti-road obstruction tapno maaddaan ti disiplina dagiti motorista ken tapno iturongda dagiti luganda kadagiti authorized parking area.
Mainaig iti daytoy, inlawlawagna nga awan ti porsyento a maal-alada kadagiti multa iti citation ticket.
Kinunana nga agbaybayad dagiti violators iti Baguio City Treasury.
