BAGUIO CITY – Nangrugin ti panangited ti Land Transportation Franchising and Regulatory Board (LTFRB) – Cordillera iti Fuel Subsidy Cards dagiti operators dagiti parapubliko a jeep nga addaan operasyon ditoy siudad ti Baguio a benipisaryo ti Pantawid Pasada Program.
Sigun kenni LTFRB-Cordillera Regional Director Engr. Lalaine Sobremonte, ita nga aldaw ti umuna a panangiwarasda iti Fuel Subsidy Cards ken inton Pebrero 12 iti alas-otso ti agsapa agingga iti alas-dose ti pangaldaw.
Gapu iti daytoy, inyapelana ti panagturong dagiti benipisaryo iti LandBank-Marcos Highway.
Naamuan a dumanon iti 683 nga operators ti jeep ditoy Baguio ti benipisaryo ti programa, no sadino, ti kwarta a linaon ti Fuel Subsidy Card ket aramatenda laeng tunggal agpakrudo wenno agpa-gasolina dagitoy.
Inyunay-unayna a nasken nga alaen dagiti benipisayo ti Fuel Subsidy Card dagitoy tapnu makapagnumarda pay iti sumaruno a rikos ti programa.
Dinakamatna nga adda manen ti sumaruno a rikos ti fuel subsidy kadagiti kwalipikado nga operators dagiti nagduduma a parapasahero a transportasyon ita a tawen.
