BAGUIO CITY – Ipangruna ti Department of Education ti panakaikonektar iti internet dagiti agarup 9,000 a ‘last mile’ schools kadagiti nasusulinek nga ili iti pagilian.
Sigun kenni Education Undersecretary for Administration Alain Del Pascua, dagiti maaw-awagan a ‘last mile’ schools ket dagiti pagadalan kadagiti nasusulinek a lugar nga awanan ti kuryente ken koneksion iti internet isut gapuna a printed modules laeng ti ar-aramaten dagiti estudyante iti manarimaan a blended learning.
Kinunana a maysa nga istratehiya ti DepEd tapnu maaksionan ti pakaseknan dagiti ‘last mile’ schools ket ti panakaimuntar ti solar panels a mangitunda tapnu maikonektar dagiti nasao a pagadalan iti renewable energy.
Innayonna nga adda metten ti partnership ti DepEd iti Department of Information and Communication Technology ken iti Benguet Electric Cooperative para iti panaka-aramat dagiti agdama a fibber optic lines ken poste ti kooperatiba para iti panakaimuntar dagiti state-of-the-art gadgets a mangipaay ti wifi access kadagiti nasusulinek nga ili.
Mangnamnama ti DepEd a babaen iti nasao nga addang ket ad-adda a mapasayaat ti panagadal dagiti estudyante gaputa malaksid iti self-learning modules ket maka-access dagitoy kadagiti dadduma a wagas a maar-aramat iti blended learning.
