BAGUIO CITY – Pagyamyamanan dagiti mayor iti Benguet ti panakaipalubos ti panagbiahe paturong ditoy Baguio City dagiti limitado a bilang ti jeep tapnu adda pagluganan dagiti apan agtrabaho, agpalengke, gumatang ti agas, agpa-agas ken agala ti kwarta.
Kasaruno daytoy ti panagparikut dagiti umili kalpasan a naipawil ti panagbiahe dagiti parapubliko a lugan kas paset ti precautionary measure iti manarimaan nga Enhanced Community Quarantine gapu iti COVID-19.
Iti panakiyuman ti Bombo Radyo Baguio kenni Itogon Mayor Victorio Palangdan, kinunana a napagnumuanda a tunggal ruta a paturong iti Baguio manipud Benguet ket mapatgan ti maysa agingga dua a jeep nga agbiahe.
Sigun kenkuana, tunggal jeep ket makabilan iti tarpaulin a pinirmaan ti maseknan a mayor.
Inyunay-unayna met a nasken a masurot ti social distancing kadagiti pasahero, nasken a nakasuot iti face mask dagiti pasahero ken ti driver ken dagiti laeng apan agtrabaho, agpalengke, gumatang ti agas, agpa-agas ken agala ti kwarta ti aglugan.
