BAGUIO CITY – Kukuwestionaran ita ti ama ti Bokod, Benguet ti panangiraman ti Land Transportation and Franchising and Regulatory Board (LTFRB) -Cordillera iti munisipyoda a maipaayan kadagiti yunit ti modernized jeep a napalubusan nga agbiahe ditoy rehiyon Cordillera babaen iti maysa a transport cooperative.
Iti panakiyuman ti Bombo Radyo Baguio, kinuna ni Mayor Thomas Wales Jr. a naklaatda idi intawag kadakuada ti LTFRB a maysa ti Bokod a pagbiyahe-an dagiti moderno a jeep a nairuwar itay laeng nabiit gaputa saanda met a kiniddaw ti nasao a banag.
Impettengna nga awan ti napasamak a konsultasyon ken saan a naikoordinar kadakuada ti nasao a banag isut gapuna a kukuwestionaranna no anya ti basaran iti panakapili ti Bokod a pagbiyahe-an dagiti moderno a jeep.
Inyunay-unayna a nasken a dumalan ti nasao a biyahe iti umno a proseso ken nasken nga adda ti maisayangkat a dayalogo tapnu maadal a nalaing.
Dinakamat pay ni Mayor Wales a nakaawat daytoy ti reklamo manipud kadagiti umili sadiay apaman a naamuanda ti panagbiahe ti modernized jeep iti ruta ti Poblacion, Bokod paturong iti Mount Pulag Ranger Station ken iti Mabaay gaputa adda met dagiti vans ken tradisyonal a jeep nga agbibiahe kadagitoy a ruta.
Maipalagip nga naiyusuaten ti PUV Modernization Program ditoy Cordillera babaen iti panakaiparang iti publiko dagiti baro ken moderno a jeep nga agbiahe iti sumagmamano a ruta iti Baguio City, Benguet ken Mountain Province idi napalabas a lawas.
