Makapaladingit ti panakaipasa ti absolute divorce bill iti House of Representatives iti pagilian a Pilipinas.
Sigun kenni Rev. Manny Flores Jr. manipud Diocese of Baguio, saan a maiannatup ti diborsyo iti panagkallaysa gapu ta ti panagkallaysa ket maysa nga awag manipud iti Apo a Namarsua.
Iti interview ti Bombo Radyo kenkuana, kinunana a ti panagasawa ket saan a maipapan laeng iti panagbalikas iti “I Love You,” saan a kanayon a ragsak, ken saan a kanayon a nakabasar iti marikrikna.
Inyunay-unayna a ti panagkallaysa ket saan nga ay-ayam ken daytoy ket maipapan iti komitment, ti panagdinanggay kadagiti anyaman a pasamak iti biyag, ragsak man wenno liday.
Kinuna pay ni Rev. Flores Jr. a maliplipatanen dagiti tattao ti kinapateg ti panag-arem wenno ti “courtship” agsipud ta makita a pinartakan ti kayatda a mapasamak iti relasyon dagitoy a saanda pay nga inadal a kusto nu daytoy metlaeng kadi ti kayatna a makadua iti tunggal biyag.
Kabayatanna, apelana iti publiko a nasken a seryosoen dagiti agassawa ti maipatpatungpal a prenuptial seminars ken investigation gapu ta ti panagassawa ket saan a para iti compliance laeng.
Innayonna pay a saan kuma nga agbain ti pagilian nu awanan daytoy iti linteg a diborsyo gapu ta rumbeng nga agbalin a napudno iti Apo a Namarsua ken saan nga iti pagayatan iti sangalubongan.//Bombo Mera Pacpacan
