BAGUIO CITY – Agtultuloy ti nainget a panangiwanawan dagiti kameng ti pulisya iti panakaipatungpal ti Republic Act 10586 wenno Anti-Drunk and Drugged Driving Act of 2013 tapno maipasigurado ti natalged a kasasaad dagiti driver ken daduma pay nga agar-aramat kadagiti kalkalsada iti siudad.
Sigun kenni PMaj. Harriet Bulcio, panakangiwat ti Baguio City Police Office, nailista ti 183 a vehicular traffic accident iti umuna a quarter ita a tawen ngem nababbaba daytoy nu idilig iti 321 a bilang idi napalabas a tawen.
Iti nasao a datus, uppat kadagitoy ket gapu iti impluwensiya ti arak nu sadino dua ti nailista a pimmusay kalpasan ti panakaaksidente.
Malaksid pay iti dayta, adda met ti naipaayan ti ticket gapu iti drunk driving.
Inlawlawag ni PMaj. Bulcio a dagiti driver a matiliwan a nakainom bayat nga agmanmaneho ket mabalin a maipaayan ti panusa.
Daytoy ket babaen iti ordinansa ti siudad nu sadino P2,000 agingga P5,000 ti multa dagiti aglabsing iti daytoy.
Iti met Anti-Drunk and Drugged Driving Act of 2013, posible a maipaayan iti nangatngato a pannusa dagiti aglabsing ken posible a maibalud nu gapu iti kaso a Reckless Imprudence Resulting in Damage to Properties, Physical Injuries wenno homicide ken posible pay a marevoke ti driver’s license daytoy.//Bombo Jez Lapizar
