Panggep ti pagilian a Pilipinas a mangisayangkat iti sabali nga autopsy iti bagi ni Jelyn Arguzon, maysa nga Overseas Filipino Worker a pimmusay sadiay Saudi Arabia kalpasan a naideklara a natural death ti rason ti ipupusayna.
Sigun kenni Department of Migrant Workers (DMW) Secretary Hans Leo Cacdac, saan nga akseptaren ti pagilian a Pilipinas ti nagbalin a resulta ti autopsy ni Arguzon nangruna ket naipatungpal daytoy sadiay Saudi Arabia.
Gapu iti dayta, naituding nga iti panangsangpet ti bangkay ni Arguzon iti pagilian ket maisayangkat ti sabali nga otopsiya nu sadino nu mapaneknekan nga adda ti foul play ket dagus a mangipila dagitoy iti kaso.
Kinuna ni Department of Foreign Affairs (DFA) Undersecretary Eduardo De Vega a sisasagana met dagitoy nga agkiddaw kadagiti otoridad sadiay Saudi Arabia iti panakaimbestigar ti nasao nga insidente nu saan a pudno ti nailanad a rason ti ipupusay ti Overseas Filipino Worker.
Sigun iti pamilya ni Arguzon nangrugi a nagtrabaho daytoy kas Overseas Filipino Worker idi Hunyo 16 iti agdama a tawen nu pay kasta saandan a makontak daytoy iti umuna a lawas ti Hulyo.
Gapu iti dayta, dagus a nagturong ni Winnie Arguzon, kabsat ti biktima iti agency daytoy para iti panakakontak daytoy ngem kinuna ti agency a saanda met laeng a makontak daytoy gapu iti time difference.
Daksang gasat ta idi Hulyo baente ket nakaawatda iti impormasyon a pimmusayen ni Jelyn Arguzon gapu iti cardiac arrest ngem saan dagitoy a patien nangruna ket immuna nga impakaamo ni Arguzon a mamalmaltrato daytoy.
Manarimaan met ti panakaiproseso ti panakaiyawid ti bangkay ni Arguzon iti pagilian ita a lawas.
Kabayatanna, napasamak met laeng ti kapada nga insidente iti sabali pay nga Overseas Filipino Worker a ni Riolyn Sayson nu sadino pimmusay daytoy idi Hulyo 16, 2024 gapu iti cardiac arrest.
