BAGUIO CITY – Nairugin ti panakaproduce ti larvae ti black soldier fly iti Irisan dumpsite idiay Irisan, Baguio City.
Daytoy ti maiwaras iti nagduduma a barangay ti siudad para iti panakaimanehar ti ‘nabubulok’ a basura.
Iti interview ti Bombo Radyo kenni Roland James Bayang, Agri-Preneur Consultant, sumagmamano kadagiti babarangay kas iti Pinewood Subdivision ket ipatpatungpalda ti black soldier fly.
Inlawlawag ni Bayang a ti black soldier fly ket maysa nga insekto nu sadino maar-aramat ti larvae daytoy a mangdecompost iti bio-waste wenno natural a wagas ti panagdecompost.
Kinunana a rinugiandan ti nasao a proyekto tapno asistaranda ti siudad maipapan iti resolusyon nga impasada seknan iti panakaaramat ti black soldier fly kas alternatibo.
Mainaig iti dayta, kabaelan ti black soldier fly a kanen ti lima a tonelada nga eco-waste.
Innayon ni Bayang a dagitoy a klase ti insekto ket awan ti dakes nga epektona iti aglawlaw ken saan a sumsumrek iti uneg ti balay apaman a nakaruar manipud iti kulongan daytoy.
Impasiguradona nga awan ti epekto ti nasao nga insekto iti salun-at dagiti tattao kas maibasar iti panagadal.
