BAGUIO CITY – Inkalintegan ti Public Order & Safety Division (POSD) ti mairekreklamo a panakairikep ti pedestrian lane iti nagbaetan ti Baguio City Public Market ken ti Malcom Square.
Iti interview ti Bombo Radyo Baguio, inaklon ni POSD Deputy Chief Daryl Kim Longid nga adu ti reklamo a naawatda kalpasan a nairikep ti nasao a pedestrian lane.
Inlawlawagna a kangrunaan a rason ti addang ket dagiti nailislista nga aksidente sadiay a mabalin a naliklikan no adda ti disiplina ti publiko.
Pakairamanan ditoy dagiti insidente ti panakadungpar iti lugan gaputa adda dagiti mabalin ken mabaelanda met a dumalan iti overpass ngem killaatda a bumallasiw iti pedestrian lane.
Impaganetgetna a maaramat kuma laeng ti pedestrian lane kadagiti disabled a PWDs partikular dagiti indibidual a naka-wheelchair gaputa awanan ti rampa ti kaasitgan nga overpass.
Kinunana nga adda metlaeng dagiti dumaldalyasat sadiay a saan met nga naka-wheelchair wenno dagiti PWDs ken senior citizens.
Imbinglayna pay ti kapadasan ti dadaulo ti Persons with Disability Affairs Office (PDAO) nga adda iti kritikal a konsidion kas PWD ngem mabaelanna latta met a dumalan iti overpass.
Impeksana a nabayagen a kiniddawda iti Transport and Traffic Management Committee ti siudad a mairikep ti nasao a pedestrian lane gapu kadagitoy a pakaseknan malaksid pay iti reklamo dagiti motorista.
Inyunay-unayna met a nasaysayaat no dumalan dagiti PWDs ken senior citizen iti overpass tapnu maipasigurado ti seguridad dagitoy nangruna iti kinaadon dagiti lugan nga agbibiahe iti siudad.
Kabayatanna, dinakamat pay ni Longid a panggepda ti permanente a panakairekep ti nasao a pedestrian lane.
Sigun kenkuana, naobserbaran a napintas ti epekto ti panakairikep ti pedestrian lane nangruna iti gunay ti trapiko.
Imbinglayna pay nga adda ti maangay a panagtaripnongda kadagiti maseknan a grupo ken opisina tapnu matalantan ti nasao a pakaseknan ken dagiti dadduma pay a pedestrian lanes iti siudad.
Inaklonna pay a karaman kadagiti apektado iti panakairikep ti pedestrian lane dagiti porters wenno vendors ti merkado publiko a naka-kariton a dumaldalyasat iti nasao a disso.
Inayonna nga iyumanna metlaeng iti nasao a taripnong ti posibilidad ti panakaipasdek ti escalator iti overpass a mabalin nga aramaten dagiti indibidual a saan nga makabael a sumang-at iti overpass.
