BAGUIO CITY – Im-imbestigaran paylaeng dagiti otoridad ti panakapapatay ti sigud a kapitan ti Barangay Bañacao, Bangued, Abra iti pasado alas dose idi parbangon.
Nabigbig daytoy a ni Robert ‘Bobby’ Buenafe Millare, 39-anyos.
Sigun kenni PCol. Afredo Dangani, direktor ti Abra Police Provincial Office, matmaturog ti biktima ken dagiti uppat a kakadwana iti maysa a kallapaw iti likod ti balayda.
Nupay kasta, nariing dagitoy gapu iti ariwawa ken sadiay a nadlawda dagiti paltog a nakaturong iti ulo dagitoy.
Nangngegda ti panangibilin ti maysa kadagiti suspek iti saan dagitoy a panaggaraw tapnu saanda nga iputok ti paltog.
Sigun kenni Dangani, pwersado a kinawtibo dagiti armado a lallaki ti biktima ken kalpasan ti sumagmamano a minutos ket nakangngeg dagiti kakadwa ti biktima iti uni ti sumagmamano a putok ti paltog.
Nagpaarayat dagiti kakadwa ti biktima iti pulisya ken iti panagresponde dagitoy ket nasarakanda ti biktima a nakadasay iti igid ti Abra River, no sadino, nagsagrap daytoy ti nagduduma a tama ti bala ti paltog iti ulo ken bagi.
Inproseso met ti PNP-SOCO ti nakapasamakan ti krimen ken sadiay a narekober ti dua a bala ti caliber 45, uppat a basyo ti bala ti caliber 45 ken tallo a basyo ti bala ti caliber 5.56mm bayat a naisayangkat ti hot pursuit operation kadagiti suspek.
Innayon ni Dangani nga iberberipikarda ti salaysay dagiti kakadwa ti biktima a nangngeg dagitoy nga insawsawang dagiti suspek a posible a mangitunda iti panakaduktal ti motibo ken iti pakabigbigan dagiti suspek.
Kidkiddawen met ti pamilya ti biktima ti tulong ti publiko para iti panakabigbig dagiti nangpapatay iti sigud nga opisyal ti barangay.
