BAGUIO CITY – Adda ti nagkurangan ti lokal a gobyerno ti Baguio City iti panakaiyaramid dagiti tactile tiles iti sumagmamano a sidewalks iti siudad ti Baguio.
Inaklon daytoy ni City Administrator Engr. Bonifacio dela Peña kagiddan ti panagawatda iti adu a reklamo manipud kadagiti umili a naigalis kadagiti nasao a tactiles kagiddan ti mapaspasaran a panagtutudo.
Kinunana a saan a nasken a pagnaan dagiti umili nga awanan ti diperensia iti panagkita dagiti tactiles gaputa daytoy ket agserserbi a giya dagiti indibidual nga addaan ti visual impairment.
Binigbigna met a nagkurang ti lokal a gobyerno gaputa saan a nalawa ti agpada a linya iti panakaiyaramid dagiti tactiles.
Dinakamatna pay a talaga a nagalis dagiti tactiles iti kanito a mabasa dagitoy.
Sigun kenni Dela Peña, ad-adalenda ita ti panakapapintas dagiti tactiles kadagiti sidewalks iti siudad tapno nataltalged nga aramaten amin dagiti umili.
Innayonna a nakalukat ti opisinada para kadagiti komento ken singasing para iti panakarisut ti timmaud a parikut kadagiti nasao a tactiles.
