Mapaplano ti panakapili dagiti atleta a mangibagi iti Private Schools Athletic Association (PRISAA) ita a tawen a maangay sadiay Tuguegarao City inton Abril a tres agingga a onse.
Iti panakiuman ti Bombo Radyo kenni Danny Cong-o, Athletic Director manipud University of Cordillera, kinunana a saan pay laeng a nalpas ti Baguio Benguet Educational Athletic League (BBEAL) nga agbalin a basaran para kadagiti atleta a makipaset.
Daytoy ket gapu ta naituding a ti sumaruno a Baguio Benguet Educational Athletic League ket inton Abril baente syete ita a tawen.
Sigun kenni Cong-o, ti arrival ket inton Abril a tres bayat a maangay dagiti scheduled game inton Abril sais agingga a dies.
Panggep met dagitoy a pakipasetan dagiti amin a kategorya ti ay-ayam gapu ta mapatta-patta a mas ado nga atleta ti makipaset iti rehiyon Cordillera nangruna ket asideg ti pakaangayan daytoy.
Kinuna ni Cong-o nga iti mapadpadaanan a Private Schools Athletic Association (PRISAA) ket tarigagayda a mapagtalinaed ti pwesto ti rehiyon kas gold medalist iti tay-ak ti weightlifting kasta met iti archery ken taekwondo.
Daduma met nga ay-ayam a pagpigsaan dagiti atleta ket ti batted balls bayat a manamnama a mapasayaat ti performance dagitoy kadagiti team sports a kas iti basketball ken volleyball.
Maipalagip nga idi napalabas a tawen, nakapwesto iti maikatlo ti rehiyon Cordillera nga imbagi dagiti agarup tallo gasu’t nga atleta manipud kadagiti uppat a pagadalan a buklen ti University of Cordillera, University of Baguio, Baguio College of Technology ken Baguio Central University.
Kabayatanna, kiddaw ni Cong-o ti agtultuloy a community partnership iti nasao a banag nangruna iti agtutuloy a suporta dagiti nagannak dagiti atleta para iti pammalubos dagitoy nga agtraining ken makipaset dagitoy kadagiti ay-ayam.
