BAGUIO CITY – Inkari ti Tourist Police Unit (TPU) ti Baguio City Police Office (BCPO) ti panangaksionda iti panakatakaw dagiti bisikleta a maipapaabang iti biking area sadiay Burnham Park.
Iti interview ti Bombo Radyo Baguio, dinakamat ni PMajor Dencio Danao, dadaulo ti nasao nga yunit ti pulisya a naiyuman kadakuada ti pakaseknan idi napalabas a lawas.
Kinunana a daytoyen ti maikadua a gundaway nga adda dagiti mataktakaw a bisikleta dagiti concessionaires ti biking area.
Dinakamatna nga iti kaado dagiti agturturong ken agab-abang ti bisikleta ket matikaw dagiti agpapaabang nga isu met ti gundawayan dagiti kustomer a mangitalaw kadagiti bisikleta.
Innayonna nga adda pay dagiti mangitartaray kadagiti bisikleta iti rabii.
Gapu iti daytoy, ado kadagiti bike concessionaires ti agbambantay iti tunggal paset ti biking area tapno mabantayan dagiti kustomer dagitoy.
Sigun pay kenkuana, ti panagwanawanda iti parke nangruna iti rabii kadwada dagiti volunteers.
