Kinnidaw ni Roderick Awingan iti Sangguniang Bayan ti pannakaamyendar ti agdama nga ordinansa seknan iti pananipawil iti ‘momma chewing’ ken panagtopra kadagiti publiko a lugar.
Sigun kenni Mayor Awingan, apaman a raraemenda ti betel nut chewing kas cultural tradition, kasapulan dagiti pagalagadan nangnangruna iti posible a pannaka-expose dagiti agtutubo iti addiction ti panagngalngal iti ‘momma’.
Gapu iti daytoy, kinnidawna iti local council ti panangi-ban iti panagngalngal ken panagtupra kadagiti amin a public workplace, healthcare facilities, public vehicles kas kadagiti taxis, bus, tricycle, ken jeepneys pakairamanan kadagiti public places kas kadagiti parke ken commercial walkways.
Maisinsingasing metlaeng iti panangiparit iti panangilako ken pananggatang iti ‘momma’ ken dagiti ramen daytoy kas iti bua, gawen, apog, tabako iti 100-meter radius manipud kadagiti amin a publiko a pasilidad, publiko ken pribado a pagadalan, playgrounds, ken pasilidad ti gobyerno.
Malaksid iti dayta, impetteng ni Mayor Awingan a kasapulan metlaeng a mainayon ti panangipawil ti panangilako ti ‘momma’ kadagiti minors no sadinno nailanad iti ordinansa a mangipaay ti mandatory community service dagiti matiliwan.
Dagiti first time offenders ket madutokan nga aglinis kadagiti public areas no sadinno impetteng ti mayor a rumbeng a manayonan pay daytoy kas iti panangmulta iti business establishments a mangipalubos iti panangilako ti ‘momma’ kadagiti minor ken iti naituding a distansya manipud kadagiti restricted zones.
Sigun kenni Mayor Awingan, ti nasao a gakat a mangamyendar iti Municipal Ordinance No. 04, series of 2011 ket maitunos metlaeng iti probisyon ti munispyo iti Smoke-Free Ordinance kasta metten iti national clean air. //karen.c.sapirao
