Manarimaan ti panangiwaras ti Office of the Municipal Agriculture (OMAG)-Bontoc ti bin-i ti nagduduma a nateng kadagiti mannalon.
Sigun kenni Cheryle T. Fungo, Agriculture Technologist ti OMAG Bontoc, manarimaan ti panangiwarasda ti bin-i ti nateng idiay opisinada nga aggatad ti P148,000.
Naigatang ti pondo ti “high-value crop seeds” a bukbuklen ti duapulo a kilo ti flowering petchay, sangapulo a lata ti snap beans, walo a lata ti tarong, walo a lata ti utong, ken dua a lata ti parya.
Daytoy ket pinondoan ti munisipyo ken ti Department of Agriculture (DA).
Ti maaw-awagn a “high value crops” ket ti mula a mangipapaay ti nangato nga income tunggal ektarya kadagiti mannalon nu idilig iti nangato nga apit ti tradisyunal a mula kas ti mais, prutas, ken daduma pay.
Maibasar ti datos ti OMAG, dumanon a sangagasut ti bilang dagiti mannalon a nagawat ti bin-i idiay opisinada manipod ti repacking dagiti bin-i itay nabiit.
Iti interview ni Remwel Sanowan, Local News Correspondent kenni Agriculture Technologist Fungo, inlawlawagna nu kasano a makatulong ti programada kadagiti mannalon.
Innayon pay ni Fungo a ti programa ket dakkel a tulong para kadagiti mannalon gaputa saanda a masapol pay nga aggastos a gumatang ti bin-i kadagiti farm supplies.
Kanayunanna, maaddaanda ti bukod a supply ti nateng iti pagtaenganda ken mabalin a mailakoda daytoy tapno adda ti pagkwartaanda.
Ti panangiwaras ti bin-i ket sigud a programa ti Department of Agriculture a saklawen ti linteg a Republic Act 7900 wenno ti High Value Crops Development Act of 1995.
Daytoy a programa ti gobierno ket nairanta a mangpatibker ti food security and sufficiency, ken addang a mangrisut ti kinapanglaw ti pagilian.
Ti panagala ti bin-i ket libre gaputa nagtaud ken programa daytoy iti gobierno.
Nupay kasta, al-allukuyen ti gobierno dagiti mannalon a paaduenda dagiti bin-i tapno adda manen maimulada, ken makipasetda iti KADIWA outlets babaen ti panangilako ti sobra a produktoda tapno metlaeng mamonitor ti beneficiaries dagitoy.
Maguyguyugoy met ti dadduma a mangkayat a mangala ti bin-i a bumisitada laeng iti opisina ti OMAG ken isabayda a mangdamag pay ti dadduma a serbisyo nga ipapaayda para kagiti mannalon.//Via Remwel Sanowan, Local News Correspondent
