BAGUIO CITY – Kidkiddawen ti lokal a konseho ti Baguio ti panagbalin a transparent ti National Electrification Administration (NEA) iti panagpilida iti baro a General Manager a mangidaulo iti Benguet Electric Cooperative (BENECO).
Nailanad iti Memorandum No. 2017-35 a maysa kadagiti kwalipikasyon ti agbalin a general manager ti kooperatiba ti lima a kapadasan iti electric utility-related business enterprise.
Inkalintegan met ni NEA-Selection Committee chairperson Nollie Alamillo a napaay ti maysa nga aplikante a mangisumitir ti dokumento a mangpaneknek nga addaan daytoy ti lima a tawen a kapadasan iti electric business enterprise.
Nupay kasta, linawlawaganna a saan met nga umdas daytoy tapno saan a makwalipikar ti maysa nga indibidual iti nasao a posisyon gaputa dumalan paylaeng iti interview dagiti aplikante ti posisyon.
Iti isasangona iti City Council babaen iti online conference, kinunana nga agpada a nakapasa iti eksaminasyon da Engr. Melchor Licoben ken Atty. Ana Marie Rafael-Banaag.
Dinakamatna a naipasidong pay dagiti dua iti background investigation ken final interview babaen iti Board of Administrators (BOA) ti NEA.
Maibasar iti NEA-BOA Resolution No. 2021-47, nakaala ni Banaag iti 94% a rating iti final interview bayat a nakaala met ni Licoben iti 82.75%.
Iti met naangay a panagbobotos ti Board of Directors ti BENECO, innem ti nangpabor iti panagbalin ni Licoben a General Manager ti BENECO bayat nga uppat ti nangpabor kenni Banaag.
Manamnama met nga agtaripnong dagiti kameng ti NEA-BOA ita nga aldaw, May 27 para iti deliberasyon ti resolusyon nga insumitir ti BENECO Board of Directors a mangibasbasura iti panangiyendorsoda kenni Banaag kas General Manager ti BENECO.
