BAGUIO CITY – Iyap-apela dagiti meat vendors iti Baguio City Publuic Market ti panangmonitor ti Department of Trade and Industry (DTI) iti presyo ti baboy ita a pandemya.
Iti interview ti Bombo Radyo Baguio kenni Nancy Alabanza, maysa a meat vendor iti Baguio City Public Market, kinunana nga adda dagiti sumagmamano a vendors a mangibabbaba iti presyo ti lakoda a karne ti baboy ken saan a sumursurot iti suggested retail price nga insingasing ti DTI.
Sigun kenkuana, adda dagiti saan a nagtungpal iti nagtulagan dagitoy a gatad ti karne ti baboy isut gapuna a saanda unay a makailako iti uneg ti merkado publiko.
Dinakamatna nga adu kadagiti vendors sadiay ti naapektaran gapu iti daytoy a sistema dagiti direct suppliers ti karne.
Gapu iti daytoy, kidkiddawena ti panagkaykaysa dagiti meat vendors mainaig iti presyo dagiti tagilakuda a karne tapnu agbalin a patas dagitoy kadagiti dadduma a vendors.
