BAGUIO CITY – Adu latta dagiti parikot a makitkita ti Land Transportation Franchising and Regulatory Board (LTFRB-CAR) seknan iti panggep a panagrugi ti operasyon ti biahe dagiti bus iti siudad ti Baguio.
Sigun kenni Engr. Lalaine Sobremonte, Regional Director ti LTFRB-CAR, maysa kadagiti mapagparparikutan ti isyu iti salun-at ken mano a yunit ti mapalubusan nga agbiahe.
Kinunana nga inaklon ti Baguio Health Department a marigatanda a mangakomodar kadagiti indibidual no aggigiddan dagitoy a sumangbay iti central triage.
Gapu iti daytoy, nairekomendar ti pannakaipasdek ti triage kadagiti terminals ti bus tapno maksayan ti adu unay nga indibidual nga agpaipasidong iti central triage iti Baguio Convention Center.
Kinunana a naiyumanda metten dagiti pakaseknan kadagiti bus operators ken immanamongda met iti nasao a panggep.
