Kidkiddawen ti lokal a gobyerno iti Baguio City kadagiti amin a barangay officials iti siudad a mangkitada ti mabalin a maaramid a communal compost pit kadagiti masakupanda a barangay.
Ti communal compost pit ti agserbi kas centralized location a mabalin a pagibillengan dagiti bumarangay kadagiti nabubulok a basura dagitoy.
Babaen iti panagaramid kadagiti communal compost pit, mabalin a makaipatungpal dagiti babbarangay iti naan-anay a biowaste management, masuportaran dagitoy ti waste reduction strategy iti siudad, ken makatulong para iti environmental sustainability.
Kabayatanna, ti nasao nga aksyon ket maisingsingasing babaen iti resolusyon nga insurat ni Baguio City Councilor Mylen Victoria Yaranon a nagkaykaysa met nga inaprubaran ti Baguio City Council para iti panakarisut iti pakaseknan a sangsangwen dagiti residente nangruna dagiti awanan ti espasyo kadagiti arubayanda a mabalinda a pagaramidan iti compost pit.
