BAGUIO CITY – Inaklon ni Abra Provincial Election Supervisor Atty. Ricardo Limpin ti posibilidad a makaapekto iti COMELEC ken PNP Cordillera ti panakaipaila ti NBI iti reklamo kadagiti nangangato nga opisyal ti PROCOR ken Abra pakairamanan ti election supervisor ti Pilar ken dadduma pay a personnel gapu iti ingkwentro a napasamak idi Marso.
Iti interview ti Bombo Radyo Baguio, inlawlawagna a saan met a makapaapekto daytoy iti panakaipatungpal ti eleksion sadiay Abra.
Sigun kenkuana temporaryo a naiyakar ti Election Supervisor ti Pilar sakbay pay nga iruar ti panakaipila ti NBI iti reklamo.
Kinunana a gapu kadagiti kaudian nga pasamak sadiay Abra ket naalada ti 2,000 a kadakkelan a bilang ti kanayunan a pwersa manipod iti PNP ken Philippine Army a mangipatalged ti eleksion iti probinsia.
Iti interview met ti Bombo Radyo Baguio kenni PMAJ Edwin Sergio, Public Information ti Abra PPO, kinunana a naiwarasen dagitoy iti nagduduma nga lugar sadiay Abra.
Karaman kadagiti nainget a banbantayanda ita ti munisipyo ti Pilar.
Malaksid iti dayta, nainget pay ti panagwanawanda kadagiti election paraphernalia a maaramat intun Mayo 9.
