BAGUIO CITY – Kiniddaw ti sumagmamano a grupo ken indibidual ti pannnakaisardeng ti Chico River irrigation project sadiay Kalinga ken Cagayan.
Nangipila ti Makabayan bloc kasta metten ti Kilusang Magbubukid ng Pilipinas iti petision iti Supreme Court kontra iti nasao a proyekto.
Impetteng dagiti petitioners a maibilang kas unconstitutional ken iligal ti nasao a proyekto.
Kiniddaw dagiti petitioners ti pannakaipaulog ti temporary restraining order wenno writ of preliminary injunction kontra iti implementasion ti Chico River irrigation project.
Naponduan ti nasao a proyekto iti P4.37-billion babaen iti utang ti Pilipinas iti China.
Sigun kadagiti petitioners, ti loan agreement iti nagbaetan ti China ken Pilipinas ket iligal gapu ta maisupadi daytoy iti sagudayen ti Section 7, Article XII ti 1987 Constitution.
Mamati dagiti petitioners a nakalanad iti loan agreement a mabalin a tagikuaen ti China dagiti patrimonial assets ti Pilipinas kas kadagiti lana iti Reed Bank no mapaay ti gobierno nga agbayad iti utang daytoy iti China.
Pormal a narugian ti implementasion ti Chico River irrigation project idi Hunyo 2018 iti sidong ti “Build, Build, Build” program ken manamnama nga agnumar iti daytoy ti agarup 4,500 a pamilia sadiay probinsia ti Kalinga ken Cagayan.
