Namnamaen ni Elsie Gis-it, mannalon ken adviser ti Benguet Agri-Pinoy Trading Center nga agsubli iti normal a presyo dagiti nateng iti kanito a madispose wenno mailako dagiti second class.
Iti pannakiuman ti Bombo Radyo kenkuana kinunana a dagiti kaaduan a nagbalin kas second class a highland vegetables ket kas kadagiti repolyo ken petchay daytoy ket gapu ta nalaka a malungsot bayat ti panagtutudo.
Pinagyamananna met dagiti maseknan nga ahensya iti panangipaayda iti tulong kadagiti naapektaran a mannalon bayat a masur-survey pay dagiti dadduma para iti tulong nga ipaayda.
Dakkel met a tulong ti pananggatang dagiti maseknan kadagiti paylaeng nateng para kadagiti mannalon kasta met iti publiko a nakaiwarasanna.
Innayon pay ni Gis-it nga awan ti naibelleng a nateng agsipud ta naipadawat dagiti saan a nagatang iti daytoy.
Kabayatanna, inlawlawagna met nga agpapada ti mula dagiti mannalon agsipud ta adda dagiti schedule wenno sistema ti panagmula a sursuroten dagitoy rason nga aggigiddan ti panag-apitda iti daytoy.
