Inabrasa ti Regional Development Council ken ti lokal a gobierno ti siudad ti Baguio dagiti Cordillerans ken dadduma pay a guest para iti maika-38 a Cordillera Day program idi kalman.
Kinaduaan dagiti delegado manipod iti nagduduma a lokal a gobierno iti innem a probinsya ti rehion Cordillera dagiti opisiales ken representatives manipod iti national line agencies, law enforcement agencies, civil society organizations, ethnolinguistic groups, ken nagduduma nga organisasion.
Nagrugi ti parada iti artistic area ti Carantes Street ken Lower Session Road paturong iti Baguio Convention and Cultural Center.
Pinasangbay ni Baguio City Mayor Benjamin Magalong dagiti guest ken delegado, bayat a ni outgoing Regional Development Council Chairperson ken Apayao Governor Elais Bulut Jr. ti nangipaay ti opening message.
Nangipaay met ni Baguio City Congressman Mauricio Domogan iti “primer of hopes” para iti rehion Cordillera a nakapokus iti pananggun-od ti otonomiya ken panagdur-as ti Cordillera.
Malaksid kadagiti nasao nga opisial, nangipaay metlaeng ti mensahe ni Executive Secretary Lucas Bersamin ken Department of Economy, Planning and Development Secretary Arsenio Balisacan.
Ti bulan ti Hulio ket naikeddeng kas selebrasion ti Cordillera Month a manglaglagip iti pannakabukel ti Cordillera Administrative Region a maitunos iti Executive Order 220, a napirmaan idi Hulio 15, 1987.
Indeklara ti Malacañang ti July 15, 2025 kas special non-working holiday iti Cordillera iti panagrambak ti maika-38 nga anibersaryo.
Ti Proclamation No. 1183 ket pinirmaan ni Executive Secretary Bersamin babaen ti pannakabalin ni President Ferdinand R. Marcos Jr.
