BAGUIO CITY–Nainget paylaeng ti panagtiliw ti Department of Transportation (DOTr)-Cordillera ken Land Transportation Office (LTO)-CAR kadagiti pribado a lugan a mangutultulod kadagiti turista nga agturong sadiay Mt. Pulag sadiay Kabayan, Benguet.
Iti interview ti Bombo Radyo kenni Mt. Pulag National Park Superintendent Emerita Albas, kinunana a nainget ti koordinasyon dagitoy iti DOTr-CAR tapnu marisut ti parikot seknan iti agbalbalin a colorum a lugan a mangitultulod kadagiti turista partikular dagiti hikers iti nalatak a bantay.
Inaklona nga agkurkurang ti van a mang-akomodar kadagiti bisita isu’t gapuna a mapilitan dagiti pribado a lugan nga agbiyahe tapnu maakomodar dagiti ginasgasot a turista.
Kinunana a nagpangato ti LTO-CAR iti franchise transportation dagitoy tapno maakomodar dagiti amin a mountain treckers ti Mt. Pulag ken nanayunan metten dagiti parapasahero a jeep nga agbibiyahe sadiay Kabayan, Benguet.
