BAGUIO CITY – Nakaunget ni Public Order and Safety Division (POSD) head Marvin Herrera iti panakaipablaak ti video seknan iti panangsitarna iti maysa nga indibidual iti paset ti fish section ti Baguio City Public Market.
Iti interview ti Bombo Radyo Baguio, impettengna a one-sided ti naipablaak a video gaputa saan a naala ti pakabuklan ken pudpudno a napasamak.
Inlawlawagna a kabayatan ti panaginspeksionda ket naimatanganda ti saan a naingato a facemask ti lalaki a kasinsinnungbatna iti video ken saan a masursurot ti social distancing a rason iti panangsitarda kadagitoy.
Kinunana a paasidegda kadagitoy ket nangngegda nga insawang dagitoy a ‘kalaban’ dagiti kameng ti POSD.
Impetteng ni Herrera a saanda a kalaban gaputa mandatoda a mangipalpalagip ken mangiwanwanawan iti panagtungpal dagiti stakeholders iti merkado publiko kadagiti health protocols tapno saanen nga agwaras pay ti COVID-19.
Nupay kasta, nagkiddaw daytoy ti dispensa iti bimmara a diskusyonda iti nasao nga indibidual.
Mainaig iti daytoy, dinakamatna a manamnama a makasuan ti indibidual nga adda iti likudan ti video a nagwaras iti social media.
Kinuna ni Herrera a naduktalandan ti kinasiasino ti nasao nga indibidual ken manarimaan ti koordinasyonda iti maseknan nga opisina para iti kaskenan nga addang.
