BAGUIO CITY–Pinaglibakin ni Public Order and Safety Division (POSD)- Deputy Head Daryl Kim Longid ti reklamo a maatap a panagkikil ken panagipangta dagiti miembro ti POSD iti negosiante a ni Eugene Galang ti Lower Magsaysay.
Iti interview ti Bombo Radyo Baguio kenkuana, inaklonna nga sinitirda dagiti limmabsing iti anti-road obstruction (ARO) iti paset ti Lower Magsaysay kasaruno ti pammilin ti national a gobierno nu sadinno karaman ti pasdek ni Galang.
Inlawlawagna a saanna nga ammo ti pagtataudan ti akusasyon ti nasao a negosiante nangruna ta amoda ket awan met ti pakaseknan daytoy kabayatan ti clearing operation ken inspection dagitoy iti nasao nga linya ti kalsada.
Inayonna nga adu metlaeng kadagiti indibidual iti nasao nga linya ti nasitarda a limmabsing iti ARO.
Kabayatanna, patienna pay nga adu dagiti makapaneknek iti ipatpatungpal ti POSD nga pammilin kas maitunos iti programa ti nasional a gobierno.
Sigun kenkuana, naitantan laeng ti implementasion ti ARO gapu iti pandemya ngem adun kadagiti negosiante ken agtagikua kadagiti pasdek ti naballagaan sakbay a nangrugi ti pandemya.
Impettengna pay patas ti panakaipatungpalda iti nasao nga pammilin ken awan ti pilpilyenda nga lugar nangruna ta nadutukan laeng dagitoy a mang-iemplementar iti nasao nga pammilin.
Inayonna a nakalukat met latta ti opisina dagitoy iti aniaman nga reklamo wenno pakaseknan dagiti negosiante wenno indibidual kadagiti kameng dagitoy tapnu mailawlawagan.
