BAGUIO CITY – Manamnama a maiyakar ti lokasyon dagiti nagduduma a korte iti Baguio Justice Hall ken ti City Prosecutor’s Office ti siudad ti Baguio.
Kasaruno daytoy ti panangbigbig ti state-owned Bases Conversion and Development Authority (BCDA) iti 3,000-square meters a lote iti uneg ti reservsation area iti Camp John Hay a pakaipasdekan dagiti istruktura ti gobyerno.
Sigun kenni Mayor Benjamin Magalong, sumarungkar to ditoy siudad iti aniaman nga aldaw dagiti opisyales ken technical personnel ti Supreme Court ken ti Department of Justice tapnu inspeksionen ti nasao a lote.
Kinunana a kitaen ti grupo no mabalin a maipasdekan ti istruktura ti nasao a lote, no anya a kita ti pasdek ti maibangon ken ti pondo a mailatang para iti nagsina a pasdek ti city prosecutor’s office ken ti Justice Hall.
Inlawlawagna pay a babaen iti panakaiyakar ti agdama a Baguio Justice Hall sadiay Camp John Hay ket mabalin met nga aramaten ti lokal a gobyerno ti siudad ti agdama a pasdek ti Justice Hall iti panakapalawa dagiti opisina ti City Hall.
Sigun kenni Mayor Magalong, basbassit ti gastos iti nasao a plano no idilig iti nasurok P800-M a mabusbos iti panakaipasdek ti walo a kadsaaran nga annex building ti City Hall.
