BAGUIO CITY – Balligi ti change of command ceremony para iti pannakasukat ti dadaulo ti Police Regional Office-Cordillera (PROCOR) a naangay sadiay Camp Dangwan, La Trinidad, Benguet.
Agserbi a kabarbaro a regional director ni Police Brigadier General Rwin Pagkalinawan a kasukat ni Pol. Brigadier General Israel Ephraim Dickson a maidestino sadiay Visayas.
Sipupuso nga inawat ni Pagkalinawan ti panagserbi daytoy kas dadaulo ti PROCOR.
Kinunana a maysa kadagiti umuna a tutukanna ti pannakikaykaysa dagiti pulis ditoy Cordillera iti kampania kontra iti 2019 novel coronavirus.
Kinunana pay a tutukanna met laeng ti panagtalinaed dagiti pulis ditoy rehion kas kadisiplinaan a pulis iti intero a pagilian.
Nagyaman met ni Dickson kadagiti amin a pulis ken umili iti rehion gapu iti pannakikaykaysada iti panagtalinaed ti linak ken kappia iti Cordillera kabayatan ti panagserbina kas dadaulo ti PROCOR.
