Dinar-ayan ti ado a katao ti kaunaan a peace rally a naipatungpal iti probinysa ti Benguet partikular sadiay Km. 5 La Trinidad, Benguet Public Market, Parking Area ita nga aldaw.
Daytoy ket babaen iti tema a “Kapya Ka-Benguetan:Healing together, united in prayer” nga indauloan ti Proclaim Cong.Yap Now Movement.
Ti nasao a peace rally ket para iti matartarigagayan a dagus a panakaiproklama ni Congressman-elect Eric Go Yap kalpasan iti saanna a dagus a panakaiproklama idi Mayo 13, 2025 gapu kadagiti disqualification case a sangsangoenna.
Malaksid iti dayta, maysa daytoy nga addang tapno mabigbig ti nagbalin a pangngeddeng iti kaaddoan iti kalleppas nga eleksyon seknan iti agtugaw a congressman iti probinsya iti Benguet.
Iti panakiuman ti Bombo Radyo kadagiti umili ti Benguet a dimmar-ay iti peace rally, kinunada nga iti oras paylaeng ti alas tres ket nagturongdan iti parking area sadiay La Trinidad para iti panangipakitada iti suportada kenni Congressman Yap, daytoy ket iti laksid a mangrugi ti nasao a programa iti oras ti alas singko ti malem.
Iti nasao a peace rally, tallo nga area ti naituding a pagpirmaan ti publiko para iti manifesto.
Maipalagip nga iti immunan a panakiuman ti Bombo Radyo kenni Gary Paul Abela, lead convenor iti Proclaim Cong.Yap Now Movement, kinunana a ti manifesto ket maipapan ti panagpirma dagiti tattao a mangsupsuporta kenni Yap tapno makiddaw iti Commission on Elections ti dagus a panakaiproklama daytoy.
Iti panagrugi ti peace rally, naikanta dagiti prayer songs kas iti 10,000 reasons, give thanks ken daduma pay.
Kalpasanna dayta ket nangipaay iti kararag dagiti pastors a dumanon iti siyam, ti panaka-ilawlawag ti manifesto, ti panangipaay ti suporta dagiti nagduduma a sektor kenni Yap kas iti senior citizens, youths, vloggers, sports, LGBTQIA+, dagiti farmers ken daduma pay.
Ditoy a naimatangan ti suporta dagiti personalidad a kas ken da Donya Pidang, Mark Siangao, Elsie Gis-it manipud BAPTC ken daduma pay.
Iti laksid a nagarbis agingga a nagtudo ken tuloy ladta ti programa agingga a nagleppas daytoy.
Kabayatanna, impeksa ti publiko ti kiddawda kadagiti sumagmamano nga indibidual nga akseptarenda ti resulta ti 2025 National ken local elections.
Daytoy ket kagiddan iti manaynayunan a disqualification case a maipilpila kontra kenni Congressman-elect Eric Yap no sadino iti agdama ket dumanonen iti pito a disqualification case ti sangsangoen ti kongresista.
Kabayatanna, iti pakasaritaan ti Benguet, mapapati a ni Yap ti nakaala iti kaadoan a botos kas Congressman a dumanon iti agarup 144-K.
Malaksid iti dayta, daytoy ti kaunaan a gundaway a napudot ti eleksyon iti nasao a probinsya a nakairamanan ti panakaipila dagiti disqualification case kasta met ti panakaipatungpal ti peace rally.
