Inwaksi ti Korte Suprema ti petision kontra kenni Senador Francis Escudero a mangikalikagum a mangwaswas iti pangngeddeng ti Political Finance and Affairs Department ti Commission on Elections mainaig iti campaign donation nga inawat ti senador kabayatan ti 2022 elections.
Maibasar iti resolusyon ti Korte Suprema a napetsaan idi Hunio 3, 2026, naibasura ti petision nga inpila ti pribado nga indibidual a ni John Barry Tayam agsipudta kamali ti legal a remedyo nga impila daytoy.
Nagramot ti kaso iti nagbalin a panggeddeng ti Political Finance and Affairs Department (PFAD) nga isardeng ti imbestigasyon kontra kenni Escudero ken Lawrene Lubiano a dadaulo ti Centerways Construction and Development Incorporated.
Daytoy ket gapu iti kinakurang ti ebidensiya iti maatap a panaglabsing iti Section 95 ti Omnibus Election Code.
Maipalagip nga immuna nga inaklon ni Escudero a nakaawat iti P30 Million a donasyn manipud kenni Lubiano.
Nupay kasta, inlawlawagna nga awan ti akemna iti panagala ti kompanya iti flood control projects ti gobierno.
