Agsagsagana ti Philippine Embassy sadiay Beirut para iti posible a panakaipatungpal ti mass repatriations kadagiti Pilipino sadiay Lebanon gapu iti mapaspasamak a giyera iti nagbaetan ti Israel ken Hezbollah.
Daytoy ket sigun iti Department of Foreign Affairs ita nga aldaw.
Sigun kenni Department of Foreign Affairs Assistant Secretary Robert Ferrer, makikokoordinaren ti embassy ti pagilian babaen ti panangidaulo ni Ambassador Balatbat kadagiti Filipino community para iti panakaisayangkat ti repatriation nu agbalin a nakaro ti mapaspasamak sadiay.
Nu pay kasta, kinuna ni Ferrer a saan met nga ipilit ti gobyerno ti pagilian nga agrepatriate dagiti Pilipino nangruna ket ado dagiti saan a mangkayat nga ag-evacuate.
Iti agdama, nakangato ti Alert Level 3 sadiay Lebanon a kayatna a sawen a dagiti Pilipino ket mabalin a boluntaryo nga agsubli iti pagilian.
Kabayatanna, kinuna ti Department of Foreign Affairs a dumanon iti agarup 11-K dagiti Pilipino nga adda sadiay Lebanon nu sadino ti kaadoan kadagitoy ket babbai.
