KIBUNGAN, BENGUET – Mapatta-patta a dumanon iti P8,400,000 ti gatadna a dried marijuana stalks ti nadiskobre ti Benguet Police Provincial Office bayat ti marijuana eradication sadiay Sitio Todag, Barangay Tacadang, Kibungan, Benguet idi March 29, 2024.
Sigun kenni Police Colonel Joseph Bayongasan, Provincial Director ti Benguet PPO, naduktalan ti nasao a mula babaen iti nagtinnipong a puersa ti nagduduma a kameng ti pulisya ken ahensiya iti gobyerno.
Naduktalan ti nasao a mula iti dua a plantasyon nu sadino pakabuklan nga agdagsen daytoy iti agarup 70 kilograms.
Amin dagitoy ket naparut ken inuram dagiti operatiba iti mismo metlaeng a lugar ken naala ti sample daytoy para iti qualitative test iti Regional Forensic Unit- Cordillera.
Agtultuloy ti nainget a kampanya ti pulisya ken nagduduma nga ahensiya ti gobyerno kontra iti iligal a droga tapno ad-adda a malapdan ti panagwaras daytoy iti probinsiya ken iti pagilian.
