Naipaiman iti kustodiya ti Philippine Coast Guard (PCG) dagiti 15 a survivor ken ti bagi dagiti dua a pimmusay gapu iti panakalned ti M/V Devon Bay idi napan a lawas iti paset ti Scarborough Shoal.
Naangay ti turnover operation ti Philippine Coast Guard(PCG) ken China Coast Guard (CCG) idi kalman iti kabaybayan a paset ti Tambobong, Pangasinan.
Sigun iti PCG, dagiti Pilipino a nareskyu ket naitransfer babaen iti rigid-hull inflatable boats bayat a dagiti dua a bangkay ket ipasidong pay ti PCG iti umno a disposisyon babaen iti panakikoordinarda kadagiti maseknan nga otoridad ken papamilya.
Imbinglay met ni PCG spokesperson Captain Noemie Cayabyab a pinagyamananda ti China Coast Guard (CCG) iti impaay dagitoy nga humanitarian assistance ken ti kooperasyonda.
Maipalagip nga idi January 22 ket timmaob ti cargo ship nga M/V Devon asideg iti Scarborough Shoal – lugar a kadawyan a pakapaspasamakan ti tensyon iti nagbaetan ti Pilipinas ken China.
Ti nasao a cargo ship ket agturong kuma idiay Yangjiang, China manipod Guatalac, Zamboanga del Sur para iti panangitransport daytoy ti partikular a klase ti mineral resource.
