Impila ti Philippine National Police (PNP) ti pito a kaso mainaig iti maatap a fuel hoarding ken dadduma pay a panaglabsing.
Daytoy ket kagiddan ti panagngato ti presio ti gasolina gapu iti tension sadiay Middle East.
Sigun kenni PNP spokesperson Police Brigadier General Radulf Tuaño, tallo a kaso ti naipila gapu iti hoarding sadiay Bicol bayat a naipila ti profiteering wenno overpricing complaint iti sumagmamano a gasolinaan sadiay Eastern Visayas ken Davao.
Malakasid iti dayta, sumagmamano a gasolinaan ti naireklamo iti panaglabsing ti trademark infringement iti Central Luzon.
Kabayatanna, naarestar ti 43-anyos a lalaki iti anti-illegal fuel sale operation sadiay Ligao City, Albay idi March 26.
Naarestar daytoy gapu iti panaglabsingna iti Batas Pambansa Bilang 33 wenno ti ilegal trading ken ilegal a panagiwaras iti petroleum products.
