BAGUIO CITY – Naiparangen ti plano ken disenyo ti Youth Convergence Center and Sports Complex iti lokal a konseho ti Baguio City.

Manamnama a marugian ti konstruksiyon ti lima a kadsaaran a pasdek apaman nga adda ti kontraktor a mangabak iti bidding ti proyekto.

Sigun kenni City Administrator Engr. Bonifacio Dela Peña, ti umuna a kadsaaran ket paradaan dagiti lugan dagiti atleta wenno dagiti personnel ti Sports Complex ken maakomodar ti 60 a lugan ken 20 a motorsiklo.

Agserbi nga opisina dagiti personnel ken dagiti atleta, multipurpose hall, auditurium ken dadduma pay ti maikadua a kadsaaran.

Agpada nga agserbi ti maikatlo ken maikapat a kadsaaran a pagsanayan dagiti atleta ti contact sports kas iti boxing ken taekwondo malaksid pay iti maaramid a bowling lane.

Mapagbalin pay a basketball court ti maudi a kadsaaran no sadino, daytoy to ti kaunaan a basketball court dagiti atleta ditoy siudad.

Imbinglay ni Engr. Dela Peña a dumanon iti P435-M ti naipaay a pondo para iti konstruksion ti nasao a pasilidad ngem kalpasan ti konsultasyonda iti Philippine Sports Commission ket dimmanon laengen iti P391-M ti pondo iti daytoy.