BAGUIO CITY – Naideklara ita nga ‘adopted son’ ti probinsia ti Abra ni Philippine National Police (PNP) Chief Police General Guillermo Eleazar.
Iti panagsarungkar ti PNP Chief sadiay Abra, impaima ni Gov. Joy Bernos ken dagiti miembro ti Sangguniang Panlalawigan kenni Gen. Eleazar ti Resolution 125, series of 2021 a mangidekdeklara kenkuana kas ‘adopted son’ ti probinsia kas panangbigbigda iti panagsarungkarna sadiay.
Naipaayan ni Gen. Eleazar iti nagan a “Magyukan”, no sadino, iti is-istorya ti tribo ti Tingguian ket maysa a natured, napigsa ken nasirib nga indibidual a mangsaksaklaknib kadagiti tattao ken ti komunidad.
Kabayatan ti seremonya ket naisagot kenni Gen. Eleazar ti kattukong wenno tabungaw hat nga inaramid a mismo ni Abrenian National Living Treasure Teofilo Garcia.
Naipaay pay iti PNP Chief ti maysa a rice mosaic portrait ken maysa a Tingguian vest.
Kabayatan ti kaadda ti PNP Chief sadiay Abra ket naiparang kenkuana dagiti 40 a rebel surrenderees manipud iti nagduduma a munisipyo ti probinsia ken naiparang pay dagiti paltog nga insuko dagitoy.
Inyawatna met kadagitoy dagiti Certificate of Entitlement iti livelihood program nga aggatad ti sag-P20,000 para iti panagrugi dagitoy iti sidong ti gobyerno.
Impaayna pay ti pammadayaw kadagiti maikari a personnel ti Abra Provincial Police Office ken impaimana dagiti kagawaan manipud iti national headquarters ti PNP.
